Shifokorlar mahalliy ayollar uchun qulay sharoit yaratish maqsadida poliklinikalarda va mahallalarda ikki soatlik uchrashuvlar o‘tkazdilar. Mavzular chegara hududlarida yashovchi ayollar uchun eng dolzarb masalalardan kelib chiqib tanlandi.

Asosiy e’tibor quyidagi yo‘nalishlarga qaratildi:

reproduktiv salomatlik masalalari;
keng tarqalgan kasalliklarning oldini olish;
muntazam tibbiy ko‘riklarning ahamiyati;
to‘g‘ri ovqatlanish va o‘z sog‘lig‘iga g‘amxo‘rlik qilish;
ayollarning tinchlik o‘rnatish va jamiyat rivojidagi o‘rni.

Jami 364 nafar ayol va qizlar seminar ishtirokchisiga aylandilar. Bu raqam — shunchaki statistika emas, balki o‘nlab mahallalarni qamrab olgan jonli muloqotlar natijasidir. Ko‘plab ayollar ilk bor shifokorlar bilan bevosita gaplashish, o‘zlarini qiziqtirgan savollarni berish imkoniyatiga ega bo‘ldilar.

Ma’lumotlarni mustahkamlash uchun 400 ta bukletlar o‘zbek va tojik tillarida tayyorlanib tarqatildi. Eng qizig‘i shundaki, bukletlar shunchaki berilmadi — ular ishtirokchilardan ularning dugonalariga, qo‘shnilariga va qarindoshlariga tarqatish maqsadida berildi. Shu tariqa bilimlar tabiiy tarzda kengayib, ayollar “axborot targ‘ibotchilariga” aylandilar.

Ko‘plab ishtirokchilar bu uchrashuvlar o‘zlariga ishonch bag‘ishlaganini, sog‘liq haqida ochiq gapirish va o‘zlari hamda qizlari sog‘lig‘iga ko‘proq e’tibor berish odatini shakllantirganini ta’kidladilar.

Loyihaning ta’sirini kuchaytirish maqsadida keng qamrovli media kampaniya ham yo‘lga qo‘yildi. Axborot materiallari “Muloqot TV” telekanali orqali efirga uzatildi. Bu kanal Farg‘ona vodiysini — ya’ni O‘zbekiston, Tojikiston va Qirg‘iziston hududlarini qamrab oladi. Umumiy auditoriya 7 millionga yaqin tomoshabinni tashkil etdi.

Ma’lumotlar, shuningdek, ijtimoiy tarmoqlar, mahalliy yig‘inlar va seminarlarda ishtrok etgan faol ayollar orqali ham tarqatildi. Bundan tashqari, ayollarning jamiyatdagi roli va tinchlikni mustahkamlash mavzusida maxsus uchrashuvlar ham o‘tkazildi.

Seminarlarning ahamiyati
Mahalliy shifokorlarning obro‘si oshdi — endi ular nafaqat davolovchi mutaxassislar, balki jamiyat rahnamolari va ustozlari sifatida ham e’tirof etilmoqda.
Ayollar va qizlar sog‘liq masalalarida ko‘proq xabardor va ishonchli bo‘lib, bu bilimlarni boshqalar bilan bo‘lisha boshladilar.
Mahalliy darajada profilaktika va tinchlik o‘rnatish mavzulari ilk bor keng muhokamaga chiqdi.
Media kampaniya orqali loyihaning g‘oyalari millionlab odamlarga yetkazildi.

“Xalqaro Konsilium” loyihasi O‘zbekiston va Tojikiston o‘rtasidagi hamkorlikni mustahkamlashni davom ettirmoqda. Loyiha shifokorlar, ayollar va OAVni birlashtirgan barqaror platforma sifatida sog‘lom va tinch jamiyat qurilishiga hissa qo‘shmoqda.