Эндиликда беморлар шифокор қабулларига электрон навбат орқали рўйхатдан ўтиш имкониятига эга бўлди. Навбат тизими махсус терминаллар орқали ёки маъмурият ёрдамида амалга оширилади. Пациентлар ўз навбат рақамини электрон таблода кўриб, белгиланган вақтда шифокор қабулхонасига чақирилади.

Поликлиника бош шифокори таъкидлашича, мазкур тизим жорий этилгандан сўнг қабул жараёнлари анча тизимли ва шаффоф бўлди:

«Аввал беморлар кабинет олдида узун навбатларда кутиб туришарди. Ҳозир эса ҳар бир қабул белгиланган вақтда амалга оширилмоқда. Бу ҳам шифокорлар, ҳам беморлар учун катта қулайлик яратди», — деди бош шифокор.

Рақамли навбат тизими қабул жараёнини автоматлаштириш билан бирга, шифокорлар ўртасидаги юкламани тўғри тақсимлаш ва беморлар ҳисобини аниқ юритиш имконини беради. Бу эса тиббий хизмат сифати ва аҳоли ишончини янада оширишга хизмат қилади.

Келгусида тизимни беморларнинг электрон тиббий карталари билан боғлаш режалаштирилган бўлиб, бу шифокорларга беморлар ҳақидаги маълумотларни тез ва аниқ олиш имконини беради.

Мазкур ташаббус Фарғона вилоятида соғлиқни сақлаш тизимини рақамлаштириш ва замонавий стандартларга мос равишда янгилаш дастури доирасида амалга оширилмоқда. Унинг асосий мақсади — фуқароларга қулай, тез ва сифатли тиббий хизмат кўрсатиш учун замонавий шароит яратишдан иборат.